— Renato Kaiser

Rauschdichten-Text vom 31. März 2014

Für diesen Text wurden verwendet: 

Fünf Begriffe aus dem Publikum und 30-40 Minuten Zeit. Die Begriffe waren:

Rüeblitorte, Kanzel, Geburtstag, Zahnbürschtli und Geometrie.

Alle weiteren Infos dazu findet Ihr hier.

Dä Raffael wartet am Usgang vom Läbä und wil vo sim Mami abgholt werde

Äs isch ämol än chliinä Bueb namens Raffael gsi. Dä Bueb isch aber nöd wi di anderä Chind gsi, nai. Er hät nöd wie all di anderä chliinä Chind mit drüü dä erscht iPod, mit Sächsi s’erschti iPhone, mit Nüüni s’erschti iPad und mit 12i s’erschte Chind übercho, nai. Dä Raffael isch no so uufgwachsä, wi me früener uufgwachsä isch. Är hät mit drü Chinderbüecher gläsä, mit nüüni Chinderbüecher gläsä, und mit zwölfi hät er nöd öppä scho äs Chind übercho, nai: Er isch immer no ais gsi. Und da hät sich au schpöter nöd g’ändärät. Di anderä sind mit 16i go tanzä, go fiirä, go umäsuufä, id Disco und in Klub. Dä Raffael nöd. Er hät Chinderbüecher gläsä.

Für d’Eltere isch da am Afang natürli super gsi. Ganz schtolz sinds uf iren chliinä gsi. Dass er äbä  nöd ä sonen verzogänä huerä Saugoof isch, wie all di anderä chlinä Justin Beaver Verschnitt, wo scho wüssed, wie schräg genau me sis Nike-Chäpli mues aleggä, no bevor’s chönd laufä. Än aschtändigä ischer gsi, än guetä. Am Geburtstag isches für si natürli au aifach gsi. Wärend alli andere Elterä amel wie di gschtöörte in Manor oder in Inter Discount oder in Media Markt gsecklet sind, wels am chlinä Rotzgoof di neuschti Version vo Call of Duty hend müese schenkä, damit er mit sinä minderjöörige Kolegä us Amerika, Japan, Dütschland und allnä andere Länder online cha Soldatä dä Grind wegballere, hend d’Elterä vom Raffael amel nur müesä zum Chinderladä go, grad um dä Eggä, immer dä glich und aifach ä neus Chinderbuech chaufe. Super isch da gsi für die Elterä. Wenn dä Raffael Geburtstag gha hät, hät er nöd mee brucht als ä neus Chinderbuech und ä Rüeblitortä. “Huere Aargauerfrass” hend die andere Chind amel gsait und en uusglachät. Und sis Mami hät denn amel gsait: “Nai, imfall, das esseds au z’Schaffhusä”. “Schaffhuusä, Schaffhusä, da isch jo ee fascht z’Dütschland!” hends denn gruefe und glached und gjoolet und sin usegseckläd und hend än Dütsche azündt, wel iri Eltere inä gsait hend, das me das so mües mache.

Aber vo all dem hät Raffael nünt mitübercho. Ganz allai isch er a sim Tisch ghocket, niemert hät mit ihm gfiiret, niemert hät mit ihm gschpielt, er hät kai Fründä kai, mueterseeleallai isch er a dem Tisch gsessä und hät sini Rüeblitorte g’ässä. Sis Mami hät en ganz mitlaidig aglueget und gfrögät “Wötsch än Sirup, Schatzi” und er hät nur abgwunke. S’Ainzig woner amel zu sinere Rüeblitorte trunke hät, sind sini Tränä gsi. Sini Mueter hät denn ganz truurig glueget und gsait: “Du lueg Raffael. Du bisch jetzt 25i. Mainsch nöd, dass mol langsam sötsch “NAI!” Hät dä Raffael denn ganz trotzig gsait und mit sine Hend versuecht z’zaigä, wi alt er den wörkli segi. 6i, hät er zaigt. 6i seger. Sis Mami hät denn aber gsait “Nai Raffael, du bisch 25i, i waiss du chasch immer no nöd zelä, aber da isch imfall gar nöd so-” NAI! I KANN ZELL!”. Wel dä Raffael sis ganzä Läbä lang nur Chinderbüecher gläsä hät, hät er weder bsunders guet chönä zellä, no guet rede chönä. “Kan zell…” hät er trotzig und gedankeverlorä is letschte Schtuck Rüeblichueche inebrummt, woner sich mit dä Fuscht is Muul ine truckt hät.

Er hät sowieso nöd vil Wörter kennt. Nur “NAI”, “KANN ZELL” und “Zahnbürschtli”. Das hät er nämli immer gsait, wenn en sini Mueter gfrogät hät, was er denn mol wöli werdä, wenn er gross segi. “ZAHNBÜRSCHTLI!” wöl er werdä, hät er gsait. Also nöd scho immer. Also aigentlich erscht so mit 21i hät das aagfangä, woner s’erscht mol vo dä Zaafee enttüscht wordä isch. Wel so fescht, wiener immer an Oschterhas und as Chrischtchindli glaubt hät, hät er au ad Zaafee glaubt. Schliesslich hät em sini Mueter woner chli gsi isch, immer än Füüfliber unter s’Chüssi glait, wenn er ainä vo sinä Milchzää, wonem uusghait sind, dä Obig vorher drunter glait hät. Woner chli gsi isch, isch da jo no herzig gsi. Aber so mit 15i, 16i, isches dä Mueter denn scho langsam ächli komisch vorcho. Und woner denn au mit 19i immer no Milchzää unter s’Chüssi glait hät, isch si denn scho chli stutzig wordä. “Wo hät er die nur her?” hät si sich amel gfrögät. Sie hät denn halt aifach denkt, dass er die us Gips oder Holz oder waiss de Gugger was gschnitzt hät. Dass idä Zitig gschtandä isch, dass irgend öpper chlinä Chind ide Nochborschaft d’Zää uuschloot, hät si so fescht ignoriert, wie alles andere wo a irem Raffael ächli komisch gsi isch. Woner denn 21i gsi isch, isch si denn aber langsam verzwiiflet und hät uufghört mit dem Zaafeezüüx. Und ab dem Moment, wo d’Zaafee am Raffael kai Füfliber me unter s’Chüssi glait hät, hät er au uufghört a si glaubä. Waner aber nie uufghört hät, isch: chlinä Chind d’Zää uuschloo. Die hett er denn immer am Mami unter s’Chüssi glait. Immer öppä zää Schtuck, agrichtet immer in Kegelform, also därä Form vo dä Geometrie, wo usgseet, wienes Rüebli. Wel er äbä sis Mami so gern hät.

Und au wenns dä Raffael nöd aifach gha hät im Läbä, au wenn er chum hät chönä redä oder zelä, und au wenn en d’Chind immer uusglachät hend, und au wenn en d’Zaafee irgendwenn so fürchterlich im Stich loo hät, trotz all dem, isch dä Raffael amel glücklich gsi, wenner sim Mami di uusgschlagnä Zää vodä Nochborschind in Rüebliform unter s’Chüssi glait hät. Wel i dem Moment isch er da wordä, woner immer scho hät wölä werdä. Dä legitimi und zueverlässigi Noochfolger vodä Zaafee. S’Zahn-Bürschtli.